Bihotz nahasiak

Fernando Morillo
Ibaizabal, 2001
Eleberria

2016-03-29 2 iruzkin

Ikasturteko lehendabiziko eguna. Nerea ikastolara joateko irrikitan dago, ondo baitaki Maitane, lagun-mina, han aurkituko duela. Aireak, ordea, abentura usain bortitza dakarkio. Neskak ezohiko zerbait susmatzen du berehala. Zer demontre ari da gertatzen?
Bi mutil berri —eta bitxi— topatzen ditu ikasgelan: Isusko eta Iban. Isuskok izaera nahasgarri bezain erakargarria dauka. Iban, berriz, isila da oso, baina ordenagailuen aurrean zeharo eraldatzen da: hackerra da.
Harreman berezia sortuko da segituan Nerea, Maitane eta bi mutilen artean, ikusi behar ez zuketen zerbait ikusten dutenean, eta ustekabeko misterio batean murgilduta amaitzen dutenean: jipoiak, Interneteko piratak, aktore ospetsu bat, Mutante ezizeneko irakasle xelebrea… Pieza ugari izango ditu xake-joko bihurtuko zaien enigma nahaspilatsu antzekoak. Jakin-minak jota, sekretuak argitzeari ekingo diote, eta laster konturatuko dira, askotan, dagoena ez dela dirudiena. Ez misterioari dagokionez, ez eta beraien arteko harremanei dagokienez ere. Eta gainera… Baina ez dugu dena hemen kontatuko, ezta? Azalpen gehiago, noski, barruan.



2 iruzkin "Bihotz nahasiak"

  1. Maddi Cabello
    Maddi Cabello
    2021-05-15 Santo Tomas Lizeoa

    BIHOTZ NAHASIAK

    Nerea, Donostian bizi den nerabea da. Lehenengo institutu egunean, bere lagun Maitanerekin klasean dagoenean, bi mutil berri ezagutzen ditu, Iban eta Isusko. Klaseak bukatutakoan, Isusko eta Nerea batera bueltatzen dira etxera. Bidean, etxe baten barruan, soinu batzuk entzuten dituzte eta gelditzea erabakitzen dute. Beltzez jantzitako gizon bat etxetik ateratzean, barrura sartzen dira eta zaurituta eta konorterik gabe dagoen gizon bat aurkitzen dute lurrean. Zergatik bukatu du gizonak horrela? Isuskok eta Nereak, Maitane eta Ibaneneren laguntzaz, arazoa konpontzea lortuko al dute?

    Liburu honen gai nagusiak misterioa eta lagun arteko harremanak dira. Misterioaren gaia nagusiki, asko gustatu zait intrigatuta eduki nauelako.
    Protagonistei dagokienez, Nerea, Maitane eta Isusko sinesgarriak dira, baina Iban ez. Ibanek egiten duena, 16 urterekin etxetik ihes egitea, hacker bat izatea eta gaztelu zahar batean bizitzea ezinezkoa dela iruditzen zait, nahiko surrealista dela pentsatzen dudalako.
    Kontakizunari begiratuz gero, lau lagun hauek egiten dituzten ekintzak asko gustatu zaizkit. Bereziki, Maria Cristina hotelean egiten duten “antzerki” guztia gizonaren logelara sartzeko.
    Amaitzeko, kontamoldeari erreparatuz, kapitulu motzek irakurketa arindu dutela iruditzen zait.
    DBH 2ko misterioa gustatzen zaien neska-mutilei gomendatuko nieke liburu hau. Bukaerararte harrapatuta edukiko zaitu.

  2. Gari
    Gari
    2016-03-31 Kurutziaga ikastola

    Nerea, protagonista, neska ausart eta beldur gabe bat da, indar handikoa gainera. Berari lagunduz, Maitane dago, bere lagunik onena, bera ere oso ausarta dena, biek batera hainbat misterio aztertzen dituzte, eta bi ikasle berrirekin batera.

    Nerea eta Maitane, ikastolako lehenengo egunerako prestatzen hasten dira, dena ondo doa, baina atetik bi mutil berri sartzen dira, Isusko eta Iban. Nerea eta Maitane bi mutilekin kalera irtetzen hasten direnean krimen baten atzean daudela ikusten dute, etxe batean sartuz lagun kuadrilak hildako bat ikusiz eta inguruko pistekin hiltzailea harrapatzen dute. Gainera Nereari Isusko gustatzen zaio, Isuskori Maitane, Maitaneri Iban eta Ibani Nerea. Horrek beraien arteko harremanean zerikusi edukiko du.

    Liburua lehen pertsonan dago idatzita, eguneroko batean. Oso laburra da, 176 orri ditu. Oso interesgarria da, eta zuri maitasuna eta krimenak gustatzen bazaizkizu, hau da zure liburua.


Zure iritzia partekatu nahi duzu?

Zure eposta ez da argitaratuko. Derrigorrezko eremuak * bidez markatuta daude

Utzi erantzuna